अपांग युवतीलाई सिस्नुपानी लगाउँदै बलात्कार

भदौ ८
: १७ वर्षकी एक अपांग युवतीलाई सुन चोरेको आरोपमा चरम यातनापछि बलात्कार गरिएको छ　। चरम यातनापछि सिस्नुपानी लगाएर बलात्कार गरिएकी ती युवतीको अहिले अस्पतालमा गम्भीर अवस्थामा उपचार भइरहेको छ　।
कपन-३ का परशुराम खड्का र उनकी श्रीमती कमलाले छिमेकी घरमा काम गर्ने दोलखा घर भएकी १७ वषर्ीया बिमला पुनमगरलाई यस्तो यातना दिएका हुन्　। उनीहरूले सुरुमा सुन चोरेको आरोपमा बिमलालाई भएभरको लुगा फुकालिदिएर एक घन्टाभन्दा बढी सिस्नुपानी लगाउँदै कुटे　। त्यसपछि कमलाले श्रीमान् र बिमलालाई कोठामा छाडेर बाहिरबाट ढोका बन्द गरिदिइन्। चरम यातना दिँदासमेत नपुगेर परशुरामले आधा घन्टासम्म बलात्कार गरेको बिमलाले बताएकी छिन्　।
२ भदौ साँझ भएको यो घटना आइतबार मात्रै सार्वजनिक भएको हो　। प्रहरी हिरासतमा रहेका खड्का दम्पतीलाई छुटाउने षड्यन्त्र भएको भन्दै अपांग र मानवअधिकारका क्षेत्रमा क्रियाशील एक दर्जन संस्थाले आइतबार पत्रकार सम्मेलन गरी घटना सार्वजनिक गरेका हुन्　।

जन्मेदेखि नै बोल्न नसक्ने बिमला लामो समयदेखि कपनमा रहेका विभिन्न घरमा घरेलु कामदारका रूपमा काम गर्दै आएकी थिइन्　। उनका आफन्त र परिवारका सदस्यसमेत कोही छैनन्　।

गत २१ साउनमा कमलाले छिमेकी घरमा काम गर्ने बिमलालाई आफ्नो घरमा बोलाएकी थिइन्　। त्यही दिन कमलाले आफ्नो दुई तोलाबराबरको सुन हराएको र बिमलाले चोरेको भन्दै उनलाई निर्घात कुटपिट गरेर प्रहरी वृत्त बौद्ध पुर्‍याइन्　। वृत्तमा एक दिन राखेपछि सुन नभेटिएको भन्दै प्रहरीले भोलिपल्ट बिमलालाई खड्का दम्पतीकै जिम्मा लगाएर पठाइदियो　।

खड्का दम्पतीले प्रहरी र मानवअधिकारवादी संस्थालाई बताएअनुसार उनीहरूले २ भदौसम्म आफ्नो सुन खोज्ने भन्दै राजधानीका विभिन्न स्थानमा बिमलालाई घुमाए　। तर, हराएको सुन नभेटिएपछि २ भदौ साँझ खड्का दम्पतीले उनलाई यातना दिन सुरु गरे　।

स्थानीयवासीका अनुसार परशुराम बाहिर निस्केपछि उनीहरूले घटनाबारे जानकारी पाएका थिए　। 'नजिकैकी एकजना बूढीआमैले भनेपछि हामीले जानकारी पायौँ,' स्थानीय चन्द्र मैनालीले भने, 'उनको जीउमा भित्री कपडाबाहेक केही पनि थिएन, रोइरहेकी थिइन्　।' स्थानीय शिला कार्कीका अनुसार नांगो अवस्थामा रहेकी बिमलाको शरीरभरि रगत आएजस्तो देखिएको थियो　। टाउको सुन्निएको र मुखबाट समेत रगत आएको अवस्थामा उनको उद्धार गरिएको कार्कीले बताइन्　।

कार्कीका अनुसार स्थानीयवासीले प्रहरी बोलाएर खड्का दम्पतीलाई बुझाएका थिए　। परशुराम भने प्रहरी आउने थाहा पाएपछि भागेका थिए　। तर, स्थानीय युवाले उनलाई नियन्त्रणमा लिई प्रहरी वृत्त बौद्धको टोलीलाई बुझाइदिएको कार्कीले बताइन्　।

बिमलाको उद्धार गरेको महिला आधारशीला नामक संस्थाकी अध्यक्ष रेणु शर्माका अनुसार प्रहरीले खड्का दम्पतीलाई पक्राउ गरेर लगे पनि बिमलाको उपचार गरेन　। उल्टै बिमलालाई समेत अनुसन्धान गर्न भन्दै गम्भीर अवस्थामै वृत्तको हिरासतमा राखिएको थियो　। 'हामीले भोलिपल्ट -३ भदौ) मा गएर उनको उद्धार गर्‍यौँ,' शर्माले भनिन्, 'गम्भीर घाइते उनलाई चिसो छिँडीमै राखिएको रहेछ　।' उद्धारपछि बिमलालाई उपचारका लागि बौद्धस्थित स्तुपा सामुदायिक अस्पताल लगिएको शर्माले बताइन्　। उनको अहिले पनि त्यहीँ उपचार भइरहेको छ　।
गम्भीर अवस्थाकी बिमलाले सांकेतिक भाषामा आफूले खड्काको सुन नचोरेको र एउटा तिलहरी परशुराम आफैँले 'तिमीसँग बिहे गर्छु' भन्दै दिएको बताएकी छिन्　। 'बिहे गर्छु भनेर उसैले तिलहरी दियो,' बिमलाको भनाइ उद्धृत गर्दै स्थानीय बाबुराम खतिवडाले भने, 'पछि आफैँले चोर दोष लगायो　।'
कुटपिटको आरोपमा पक्राउ परेका खड्का दम्पतीविरुद्ध बिमलाको बयानपछि स्थानीय अधिकारवादी संस्थाहरूले बौद्ध वृत्तमा जाहेरी दिएका छन्　। परशुरामविरुद्ध बलात्कारको जाहेरीसमेत दर्ता गराइएको महिला आधारशीलाकी अध्यक्ष शर्माले बताइन्　। जाहेरी दर्ता गरेपछि प्रहरीले प्रसुतिगृहमा बलात्कार भए-नभएको प्रमाणित गर्न स्वास्थ्य परीक्षण गराएको छ　। परीक्षणको रिपोर्ट पाँच दिनपछि मात्रै आउने बताइएको छ　। प्रहरी वृत्त बौद्धले खड्का दम्पतीलाई हिरासतमा राखेर अनुसन्धान गरिरहेको जानकारी दिएको छ　। परशुरामलाई वृत्तकै हिरासतमा राखिएको छ भने कमलालाई गौशाला प्रभागको हिरासतमा राखिएको छ　।