भाद्र ७ -
सिरहा नगरपालिका २ मा आइतबार राति स्थानीय एक समूहको आक्रमणबाट उत्तिमलाल यादब सहित उनका दुई छोरा प्रमोद यादब र प्रदिप यादब गम्भीर घाइते भएका छन् । उत्तिमलाललाई टाउकोमा रड र ओठमा कुखुरी प्रहार गरी गम्भीर घाइते बनाइएको छ । उनको टाउकोमा ६ र ओठमा १४ टाँका लगाइएको छ । यस्तै उनको दुई छोरामाथि पनि रडले कुटपिट गरिएको छ । घाइते तीनै जनाको उपचार सिरहा अस्पतालमा सम्भव नहुँदा थप उपचारका लागि धरान रेफर गरिएको उपचारमा संलग्न चिकित्सक बिष्णुदेव मण्डलले बताए । पुरानो रिसईबीका कारण स्थानीय शम्भू यादव, देवकुमार यादवलगायतका ब्यक्तिहरुले उनीहरुलाई रातिको समयमा घरमा बसिरहेको अबस्थामा निर्घात कुटपिट गरेको स्थानीयबासीले बताए । उनीहरु फरार रहेको प्रहरीले जनाएको छ । उक्त घटनामा संलग्न तीनजनालाई प्रहरीले अनुसन्धानका लागि नियन्त्रणमा लएको जिल्ला प्रहरी कार्यालय सिरहाले जनाए पनि नाम भने खुलाउन चाहेन ।